الأب

الأب

جُوّايَا كَلام كتــــير فى القلب

أحلى كلمة فى الدنيا" الأب"

نفسى ألاقى حُضن زمان

الحُضن الّلى مَليان مَع الِقوة حَنان

 وقَسوَة مِتشرَّبَة بالحب ..

علِّمنى آخد حقى وأنا ِلسه على قَدى

ويرضَى لو زَعلان ويعرفنى من رَدى

ومِشْ هَنسى ضِحكتُه وأنا بَهزِمه فى اللعب

كَانت نَظرتُه تخوِّفنى ولَمسة إيِده تطمنِّى

كَان مِن عيِنى يفْهَمْنِى وبالنَّظرة يكلمنِّى

وكان رضاه فعلا من رضا الرَّب ..

كان المشاعر واللِّى مَحدش بيه شاعر

   أصيل وابن أكابر.. كان للصعب مكابر

وكلمتُه تمشى على الكُلْ بالأدب ..

لما يِندَه اِسمى شِئ جُوايَا يِتْنِفِضْ

مَفِيش طَلَب ِلِيه يِترِفِضْ

والله مِشْ بالعَافية دَه كَان بالحُب..

 ولما يبقى عارف ويعديهَا

وتيجى حَاجَة بَعديها تفكروا بيَها

وأقُول نِسى  وأَتَارِيه بِيحسِب ..

أَحْلَى كلمة فى الدُنيا "الأب"

عِرِفت مِنُّه مَعنَى الصَّاحِب

والَكرَم وكِلمة مَراحِب

ولَّمَّا صُوتُه يِعلَا بزعَل بأَسْكُت وأَطُب..

وَأَفْرَح بفَرحة عِنيه وخُوفه عَليَّا

وأمّى لحظة عَصبِيُته مَعديَّه

يعمِّلها خَاطِر و يِطَبْطَب ..

أَقَول إيه غير إنى هُوَّ وهُوَّ أنا

فى نَظرتُه وضِحكتُه ومَشيتُه

لما النَّاس تقُول إنى ولدُه أَيْوه أنا

أَرُد وبعلوِ صوتى آه والله ما كِدب..

قالوا كان جَدع كان رجِيل وعِترة

وكمان يا سِيدِى عالدَلَع وهو ماشى فى الحتة

 لاعُمرُه خَاف ولا وعُمره يُوم  اِنسَحَب

راجل سِيرته حَاضرَة بين الناس

بالخير و الوِّد و مِتزَيِّنة بِالَماس

الحمد لله أن أَبُويا .. نِعم الأب

أحلى كلمة فى الدنيا "الأب"

اوعى تبكى ..

  إِوْعِى تِبكى عليّا لـمَّـــا يغسّلُونى

   إوْعىِ تقولى كان أَبُويَا و أَخُويَا

       ورجعوه ده كان نُور عِيونى !!

      وتقولى أنه كان الولد والسَّنَد

       وتحلِفلْهم يا ناس صَدقُونى!

       اوعى تِدمَع عليـَّـا عنيك اوعى

              اوعِــى لكلامى .. اوعـِـى تخَالفِى ظنُونى

        كنتِ أمى وأختى وهَوايَا ونسـْـمِتى

    وفَرحتك فَرحِتى وكل كُونِى

شُوفى لونِك.. هـوَّ لُـونى

وعقلك وفكرِك ويشغلنى اللى شاغلِك

حتى جنُونك كان من جنُونى ..

فَاكرة زَمَان فى بِيتـــــنا

تكْمَلشِ يومين زَعلِتنـــا..

لِيه دِلوقتى طَالت وعنِيك جَافُونى؟

  دَعْوِتك يا أختى تِكْفِىِ

ربنَا يقَدَّرْنى وَأَوَفّى وَصيّة اللّى ربوُّنى

عمرِى ما أَنسى وأنتِ بتقُولى

خُدنى جَنبك أو هَات شِوية

ولاَ وأَنَا بتحايل عليك تِكوِى القَميص

أوتحضرِّى الأكل ليًّــــــا

مُستحيل أَنكر فضلِك عليــــًّــا

مُستحيل والله دَا أنتِ أَجْمل هديَّة

هدية من أمى ووصَّانى أبوك كام وصيَّة

كُـنْ لأختَك السَّند .. أنتَ الوَلد وهىَّ الحنــيّة  

مِين بَعدى ليها؟ ولمين بعدى تلقاها مستنيــَّـة؟

قلت يا نَـفسى جددِى الوعدَ والنـــــيَّة

وصُونى وكُونى لغاية ما يغسـّـلونى

بــسْ قُولى عَلَى اللّى فى قَلبِك ..

ولو بالكلام أنا اللّى غالبِك ..

طب والله ما أعرف أعَاتبِك ..

لــوْ غلطَان حَقِك عليَّا وخدَّامينك عُيونى ..

لـــَكِـنْ الحق لأجل أبقَى صَافى ..

أنتِ شوية شِديدَة

ودمَاغِك دِى حِتة حَديدة

 آه ليكِ شَخْصِيّة.. بَسْ عَنيدة ..

 كنتِ تُقولى وسط الولاد رَبُونى

لكن الحكاية مش بِنت ووَلد..

 الحِكاية حِكاية فِكر اِتوَلَد

 لما فى يوم قُدام عُيونك دَمعت عُيونى

كونى ولا لا ..... لا تكونى

كونى حاسَّة بالوجَع اللّى فى ضُلوعى

ولا تكونى خَاسرة زَرعِى وقُلوعى

بكرة لا بِيع ولا شِرا ... ولا شَاركونى

شوفت فى مرة نَظرة مِنّك

آه ظلمتك حتى لو ما ظَلمتك

اتكلمى قولى حاجة سِيبى رِيحتك

ده اللى شَبهك بيفكَرُونى

أختى حبيبتى .. والله حبيبتى بجد

تيجى سيرتك وعِيالى يسألونى

عمتُو غَايْبَة ليه ومُش بِتيجى ليه

 يُسكُت لِسانى مُش هَرُد اُعذرونى

 عَدَلْتِيش ومَعْقِلتِيش .. مَفِيش 

مفيش عَنْدِك مُسَامحَة وحَبِة مُصَالَحة؟؟

 إياك إياك تقولى سِيبونى...