عاوزين نرجّع مصر

بس مش بأغنية ولا بوقفة عواطلية

مصر حاجة كبيرة وسرّها مخليها دى مصر

عاوزين نرجع مصر

مصر  ليها كلمتها مكانتها

الكل يحب ضحكتها و فسحتها

ويا ستّار من زعلتها و غضبتها

عاوزين نرجع مصر

مصر القضاة .. الرماة.. والقناة

الطبيب ودواه وقوت الغريب اللى تاه

واللى اتعلم فيها يا هناه

عاوزين نرجع مصر

مصر الهلال اللى بيهل وعالخير بيدل

المسامحة والمصالحة خيرها يكتر ما يقل

عاوزين نرجع مصر

مصر العبور واللى عالعروبة غيور

انتصار بعد انتصار والنيل أنهار ونور

عاوزين نرجع مصر

مصر الجدعنة مش مسكنة

 بتفرح ولو وسط المحزنة 

وفى الكورة متجنّنة

سترة الكعبة والتكية والكنيسة المرقسية

 وفى الفنّ متفنّنة

عاوزين نرجع مصر

مصر الطبلاوى و المنشاوى و الحصرى واللى غاوى

لا صوت الآذان يزّعل ولا ترانيمك يا عم تقاوى

عاوزين نرجع مصر

مصر الجوامع المصانع نظافة الشوارع

   الأمان وموائد الرحمن و الكل مسارع

  مسلم مسيحى مد إيدك مفيش موانع

عاوزين نرجع مصر

بحواريها وسواقيها وحكاياتها الحلوة نحكيها

لو عندك كلمة حلوة نغنيها

ولو لأ خليها فى قلبك خليها

عاوزين نرجع مصر

لمين غيرها القلب رق

واللى يكرها يارب يطق

محسودة بس موجودة ولو مية ألف لأ

عاوزين نرجع مصر

عاوزين نرجع مصر ... عاوزين نرجع مصر

بلطجى جدع

سنة 2001 واحد من أصحابى اشتغل مندوب لمصنع شيكولاته وكان بيوزع فى محافظة أسوان , وفى يوم من أيامه راح بعربة البضاعة لتاجر من خيرة النصابين راح له برجليه , التاجر بسرعة رفع البضاعة كلها وكانت حوالى تتقدر بـ سبعة آلاف جنيه وصبّر صاحبى بألف جنيه وقاله " لف لفه وتعالى خد باقى الحساب " , عزم نفسه على عزومه جاحدة فى أجمد مطاعم أسوان وعصاير وسجاير ولما رجع للتاجر .... المحل مقفول .. يسأل عليه .. عم ياسر فين ؟ يسمع كلمة " مُخلف يا ولدى " أو الغريب ضرير" لكن قعد ينادى ويسأل عليه لغاية لما فوجىء !!! التاجر ساكن فوق المحل ونزل واخد الشاور و متروق عالآخر وقال لصاحبى بس يا عم أسبوع وتعالى .

زادت الصدمة مسك فالتاجر وقال " مش هسيبك إلا فى القسم " والناس حجزت خوفا على صاحبى وفى لحظة التاجر أقصد الحرامى اختفى . فى القسم قالوا:  ما الإثبات؟ فلا شئ ولا إيصال أو فاتورة وعاد إلى سوهاج يجر أذيال الخيبة .

اقترح أحد الأصدقاء أن نذهب إلى عضو مجلس الشعب اللواء" حازم حمادى ", وبالفعل ونحن فى المقر الانتخابى أحسن مقابلتنا و اتصل "بمدير أمن أسوان "وأوصاه علينا وسافرت معه لأسوان وكان رجال مديرية أمن أسوان بانتظارنا وتحركنا معهم على الفور مرات متتالية لبيت المدعو "ياسر" لكن لم يتوصلوا إليه فنصحونا أن نراقبه فإذا رأيناه أو عرفنا بتواجده فسوف يأتوننا على الفور ومر اليوم والآخر ولا شئ يوصّلنا لهذا النصّاب المتبجح, أثناء تجوالنا فى أسوان رأينا أبو الحجاج صديق من أيام الجامعة فرحّب بنا وأقسم أن نتغدى عنده فى البيت, و قصصنا عليه ما حدث فرد بأن الحل عند بلطجى جدع اسمه " رضا " ورحنا عالقهوة اللى بيقعد عليها رضا , استقبلنا وأكرمنا و مش عارف إزاى بلطجى ووجهه بشوش ولا أية علامة تدل على البلطجة أيوه هو قوى , مفتول العضلات الطبيعية التى تدل على العافية أو العمل فى الأرض لكن هم قالوا عنه بلطجى ..  نادى رضا على صبى القهوة وقاله : روح لياسر بتاع حكاروب قل له  "عمك رضا عاوزك". وفى أقل من عشر دقائق ياسر النصاب أمامنا ويرجو العفو لأنه لا يعرف أننا تبع "رضا " قال رضا له " الخلاصة .. دلوقتى ألفين وكل شهر خمسمائة جنيه " فرحب وأخرج الألفين جنيه من جيبه .. عرضنا على رضا فلوس قال: " أحلى حاجة تمشوا مرضيين" . بجد مكناش نحلم نرّجع خمسة جنيه من الفلوس , بجد الله يباركلك فى صحتك يا رضا ويزيد من أمثالك .
....... هل تجوز الدعوة للبلطجى ؟ .. بس والله بلطجى جدع !

سليلة الأمراء

كم أشتاقُ لعينيك يا سليلةَ الأمراء

وفرحا يدقُ قلبى عند اللقاء

ويَشحُبُ لونى ويذُوغ بَصرى بين الأضواء

باحثا عنك أو عن سرٍ لك يا مَن مَلكت الصفاء

ففى عينيك بحور أمواجها علياء

تسعد على شاطئيها مَن تحب

وتخفى من أراد الاِعتداء

شفاة تنطق فى داخلها قَبل الابتداء

وأصابعٌ مثل الثلج بلمستها يضيع العناء

فأنت لى حلمٌ وكم مِن حَالمٍ

حقق حلمه وإنْ كانوا أقلاء

أنت أنشودة العقل ومُنيَة القلب على السواء

وأَسألنى عنك تائها؟؟ من تكونين ؟

وما السر فى عينك يا ابنةَ حواء

وهل تجذب كلَ رائِيها ؟ أم أنا المقصود رُؤياها ؟

ليتنى المقصود فالقلب قبلَك عاش ليالٍ سوداء

وآن لسفينتِه أن يقرَّبُ لها الميناء

ودقى أبوابَ مدينته ولا تتردَدَى دخولها

تجديها كهوف وأودية عتماء

وشاعرٌ قد ضيَّع عُمرَه باحثًا عن

 كلمات فرح لم يجد قبلك إلا الرثاء

فلا تتعجبينى وقلبى ولا تستفهمى ما وراءنا

فقد عاهدنَاك الوفاء

ستجدين قلبا لجوارك وفارسا

لأحلامك إن أراد الله وشاء .

حبيبتى بتتجلع

 هَعْ هَعْ هَعْ

حبِيبتى بتتْجَلَّع

بتقُولِّى اتجوزْنِى .. دَه أنا قلبى مَولع

ولو يوم بَصيت لِغيرى .. للدنيا هتودَّع

كلامها فى وِدَانى .. وصورتها مِخوفانِى

شايفْها ماسكة زَقلة .. وقالت لى هَجيلك تَانى

وفَكِر زِين فى كَلامى .. قَبل مَا تِتِوجَّع

هَعْ هَعْ هَعْ حبيبتى بتتجلع

وفى يوم واقف فى الدُرة و جَاتت علىَّ من وَرا

وضربتنى على دماغى .. مَعْرِفش ايه اللِّى جرَى

الناس بعدين حكتلى.. أتاريها ههههه  مَسْخَرَة

على بيتهم سحبتنى وقالت .. أَهُو فى الدَّرَا

مدام مش حبيبتك.. يبقى هتتقطَع

هعْ هعْ هعْ حبيبتى بتتجلَع

قالت هتدينى درس .. وتخلعلى بدل السِّنة ضِرس

يا حبيبتى ده مش حب , ده اسمه نَحس

وكده هتفقرينى .. وعمرى بيك ما هَحِس

يعنى اللى نصيبى من الدنيا يطلع بعْ بعْ

هعْ هعْ هعْ حبيبتى بتتجلع

يا حبيبتى أنا اتهَديت .. بسببك للموت اتمّنِيت

سبينى لحالى وأحوالى .. وحملى على الله رَميت

 يمكن يوم أتقدملك.. وتقولى ياريتك ما جِيت

علشان فى بيتكم .. أولع والله أولعْ

هعْ هعْ هعْ حبيبتى بتتجلع

حكايتنا بقت قِصة.. وطالعة بشعرك وقُصة

يقطعك يا شيخة .. عليك حتة بَصة

تفزع الشُجعان وتخلى الواحد يبلبع

هعْ هعْ هعْ حبيبتى بتتجلع

قلتلها شايفة الدنيا.. قالت شايفاها حاجة تانية

قلت لها ناوية على إِيه .. قالت دُونت أَفريد

أنا مسافرة موريتانيا.. حب غيرى براحتك

لكن مسيرى هأرجع .. وهعْ هعْ هعْ