عاوزين نرجّع مصر
بس مش بأغنية ولا بوقفة عواطلية
مصر حاجة كبيرة وسرّها مخليها دى مصر
عاوزين نرجع مصر
مصر ليها كلمتها .. مكانتها
الكل يحب ضحكتها .. فسحتها
ويا ستّار من زعلتها .. غضبتها
عاوزين نرجع مصر
مصر القضاة.. الرماة.. والقناة
الطبيب ودواه وقوت الغريب اللى تـــاه
واللى اتعلم فيها يا هنـــــــــاه
عاوزين نرجع مصر
مصر الهلال اللى بيهل وعالخير يدل
المسامحة والمصالحة خيرها يكتر ما يقل
عاوزين نرجع مصر
مصر العبور واللى عالعروبة غيور
انتصار بعد انتصار والنيل أنهار ونور
عاوزين نرجع مصر
مصر الجدعنة مش عنعنة ولا موضة متجنّنة
سترة الكعبة والتكية وفى الفنّ متفنّنة
عاوزين نرجع مصر
مصر الطبلاوى المنشاوى الحصرى واللى غاوى
لا صوت الأذان يزّعل ولا ترانيمك يا عم تقاوى
عاوزين نرجع مصر
مصر الجوامع المصانع نظافة الشوارع
الأمان وموائد الرحمن الكل مسارع
مسلم مسيحى مد إيدك مفيش موانع
عاوزين نرجع مصر
بحواريها وسواقيها وحكاياتها الحلوة نحكيها
لو عندك كلمة حلوة نغنيها
ولو لأ خليها فى قلبك... خليها
عاوزين نرجع مصر
لمين غيرها القلب رق
واللى يكرها يارب يطق
محسودة بس موجودة ولو مية ألف لأ
عاوزين نرجع مصر
عاوزين نرجع مصر ... عاوزين نرجع مصر
ليست هناك تعليقات:
إرسال تعليق